November 6, 2009

ಬದಲಾವಣೆ

ಅಂದು, ಕಥೆ-ಕವಿತೆಗಳನು ಓದುತ್ತಿದ್ದೆ
ಬಣ್ಣದ ಪದಗಳ ಕಂಡಿದ್ದೆ
ಅವುಗಳ ಪುಳಕಗಳನು
ಅನುಭವಿಸಿದ್ದೆ, ಆದರೆ
ಭಾವನೆಗಳನ್ನಲ್ಲ!


ಮುಂದೆ, ನಾನೂ ಬರೆದೆ,
ಪುಟಗಳಂತೆ.
ಪದಗಳ ಪೋಣಿಸಿ
ಮಾಲೆಯನಾಗಿಸಿದೆ,
ಸುವಾಸನೆ?
ಸಿಕ್ಕಿರಲಿಲ್ಲ, ಎಂದೆಂದಿಗೂ.
ಆದರೂ ತೃಪ್ತಿಯ ತುದಿ,
ಗೆಲುವಿನ ಅಹಂಭಾವ!!


ಇಂದು, ಸೋತು ನಿಂತಿರುವೆ,
ಭಾವನೆಗಳ ಉತ್ತುಂಗದಿ,
ಪರಿಮಳವ ತುಂಬಲು
ಪದಗಳೇ ಸಾಲದು
ಎರಡು ಪದಗಳ ಜೋಡಿಸಲೂ
ಸೋತಿಹೆನು , ಪುಟವೆಲ್ಲಿಯದು?
ಹಾಳೆಯೆಲ್ಲ ಖಾಲಿ,
ಬರೆದ ಪದಗಳಲೂ ಅತೃಪ್ತಿ!
ಆದರೂ ಎಂಥದೋ ಸಂತಸ,
ಸೋಲಿನಲೂ ಪರಿಪೂರ್ಣತೆ.

-ಸೋತು ಗೆದ್ದವಳು!!!